ឃី សុឃុន បេក្ខជន Top 4 The Voice Cambodia ២០១៦ មានប្រវត្តិយ៉ាងណា?

ឃី សុឃុន ដែលជាបេក្ខភាព Top4 ក្នុងកម្មវិធី The Voice Cambodia រដូវកាលទី ២ នេះ បើទោះជា មិនទទួលបានពានកម្មវិធីលំដាប់ពិភពលោកមួយនេះក៏ដោយ តែលោកក៏ទទួលបានការចាប់អារម្មណ៍ពីមហាជនផងដែរ។ ចង់ដឹងពីការតស៊ូរបស់ សុឃុន យ៉ាងណា? សូមតាមដានជាមួយ Sabay ខាងក្រោមនេះ៖

ស្ថានភាពគ្រួសារ

លោក មានស្រុកកំណើតនៅភូមិអូរសំបួរ ឃុំក្ដីដូង ស្រុកស្ទឹងសែន ខេត្តកំពង់ធំ។ សុឃុន ជាកូនអ្នកចម្ការ និងមានបងប្អូនទាំងអស់ ៥ នាក់ (ស្រី ២ ប្រុស ៣) ហើយ លោក គឺជាកូនទី ៤។ ឪពុក សុឃុន មានឈ្មោះ ហ៊ី ឃី អាយុ ៥២ ឆ្នាំ និងម្ដាយឈ្មោះ ហៀង ហ៊ាក អាយុ ៥៣ ឆ្នាំមានមុខរបរជាកសិករធ្វើស្រែចម្ការ។ សុឃុន កើតនៅថ្ងៃ ១០ ខែ កក្កដា ឆ្នាំ ១៩៩៣ ដែលមកដល់ពេលនេះ លោកមានអាយុ ២៣ ឆ្នាំហើយ។

ប្រវត្តិសិក្សា

អ្នកស្រុកកំពង់ធំរូបនេះ គឺជានិស្សិតឆ្នាំទី ៤ ផ្នែកធនាគារនៅសាកលវិទ្យាល័យមួយក្នុងរាជធានីភ្នំពេញ ដែលបានផ្លាស់មករស់នៅទីក្រុងអស់រយៈពេល ៥ ឆ្នាំមកហើយ។ កាលពីក្មេង ឃី សុឃុន រៀននៅបឋមសិក្សា អូសំបួរ អនុវិទ្យាល័យព្រែកស្បូវ និងបញ្ចប់ថ្នាក់សញ្ញាបត្រទុតិយភូមិនៅវិទ្យាល័យកំពង់ធំ។

ជីវិតតស៊ូក្នុងសិល្បៈ

ដឹងក្ដីពេញរូបពេញរាង ឃី សុឃុន ដឹងថា ខ្លួនឯងមាននិស្ស័យទៅរកសិល្បៈចម្រៀង ក៏ចាប់ផ្ដើមហាត់ពុតខ្លួនឯងខ្លាំងលើសិល្បៈចម្រៀងប្រមាណជាង១ ឆ្នាំចុងក្រោយនេះតែប៉ុណ្ណោះ។ យ៉ាងនេះក្ដី កាលពីអាយុ ១៨ -១៩ ឆ្នាំ សុឃុន ក៏ធ្លាប់បានទទួលបានចំណាត់ថ្នាក់លេខ១ សម្រាប់ការប្រឡងចម្រៀងនៅសាលាអង់គ្លេសមួយកន្លែងនៅស្រុកកំណើតដែរ។ មហិច្ឆតាសិល្បៈមិនទាន់អស់ ពេលមកនៅភ្នំពេញ លោកធ្លាប់បានទៅប្រឡងចម្រៀងនៅទូរទស្សន៍បុស្តិ៍លេខ ៣ រហូតដល់វគ្គផ្ដាច់ព្រ័ត្រថែមទៀត តែមិនបានទទួលចំណាត់ថ្នាក់ឡើយ។

បរាជ័យម្ដងជាពីរដង ឃី សុឃុន លែងរវល់នឹងការប្រឡងទៀតហើយ មុនពេលមកប្រឡងកម្មវិធី The Voice Cambodia រដូវកាលទី២នេះ ពោលគឺលោក ត្រូវប្រឹងរកកម្រៃចិញ្ចឹមក្រពះសិន ក្នុងនោះ លោកធ្លាប់បានទៅច្រៀងនៅតាមកន្លែងមួយចំនួនដែរ៖
-ណាហ្គាវើល បានប្រមាណ ៤ខែ
-Happy 7
-Blue Monkey
-Fun
-រហាត់លាភ ១ និងធ្លាប់ដើរច្រៀងតាម Afiar ខ្លះៗដែរ។

មូលហេតុដែលជំរុញឲ្យប្រឡង The Voice

ដំបូងឡើយ លោកមិនជានឹកនាទេ ដោយសារស្នាមបរាជ័យលើការប្រឡងកន្លងមកមិនទាន់រលុបបាត់ ប៉ុន្តែដោយសារមិត្តភក្ដិចេះតែជំរុញផង ខ្លួននៅមានចិត្តស្រឡាញ់សិល្បៈចម្រៀងខ្លះផង ទើបលោកសម្រេចចិត្តមកដាក់ពាក្យប្រឡងក្នុងកម្មវិធី The Voice Cambodia រដូវកាលទី ២តែម្ដង ដោយលោកបានពុះពារធ្វើដំណើរទៅទិញពាក្យប្រឡង កាត់ក្រោមតំណក់ទឹកភ្លៀងរាប់ម៉ឺនតំណក់។

ទោះមិនបានជាប់ជាម្ចាស់ពាន ក៏អ្នកស្រុកកំពង់ធំរូបនេះ បានឡើងមកដល់វគ្គផ្ដាច់ព្រ័ត្រដែរ។ ប្រការគួរកត់សម្គាល់ សុឃុន ពីដំបូង ក៏ជាកូនក្រុមរបស់ Coach កញ្ញា ដែរ តែលោកត្រូវម្ចាស់បទ “មនុស្សម្នាក់នេះ ខុសលើអ្នកណា” ជម្រុះក្នុងវគ្គ The Battle សប្ដាហ៍ទី 3 ហើយជ្រើសរើស ថែល ថៃ ជំនួសវិញ បន្ទាប់មកត្រូវបាន Coach ឆន សុវណ្ណរាជ Steal‬ បាន៕