ប្អូនជីដូនមួយនាយខ្យងថ្លែងមក Sabay តាមរយៈសារអេឡិចត្រូនិកថា លោក ខ្យង កើតជំងឺសរសៃត្បៀត ប៉ុន្តែមិនមែនតែមួយទេ គឺលោកមានត្បៀតសរសៃឈាមដល់ទៅពីរ ជាហេតុធ្វើឲ្យការចំណាយកាន់តែអស់ច្រើន។
“ព្រោះបើសិនជាសរសៃឈាមត្បៀតតែមួយគឺ $6000 តែគាត់ត្បៀតសរសៃឈាមពីរ ហើយគ្រាន់តែថ្លៃថត គឺ៧០០$ ហើយនៅចំណាយផ្សេងទៀត អំឡុងពេលគាត់នៅបន្ទប់ ICU ប្រហែលមួយថ្ងៃត្រូវចំណាយ ៣០០ ទៅ ៤០០$”។
ប្អូនថ្លៃ ស្រីតុ បន្ត៖ “ ពេលនេះគាត់បានធូរច្រើនហើយ ពេទ្យមិនទាន់បានប្រាប់ថា ថ្ងៃណាចេញនៅឡើយទេអូន ហើយស្ថានភាពកំពុងតែស្ថិតក្នុងការតាមដាននៅឡើយ”។
យ៉ាងណាមិញមុនថ្ងៃបញ្ជូនស្វាមី តារាកំប្លែង សុខ ចាន់ធីតា ទៅដល់ប្រទេសវៀតណាម ប្អូនថ្លៃនាង ប្រាប់ថា ដំបូងឡើយលោកខ្យងញ៉ាំបាយថ្ងៃត្រង់ហើយគេង ពេលកំពុងគេង លោកក៏ស្ទុះក្រោកឡើងហើយប្រាប់ប្រពន្ធថា ពិបាកដកដង្ហើមណាស់ ហើយគ្រួសារក៏បានយកលោកទៅពេទ្យជិតផ្ទះប៉ុន្តែភ្លាមៗ ពេទ្យប្រាប់ថាលោកមានសភាពធ្ងន់ក៏បញ្ជូនលោកទៅកាល់មែត្រ និងចុងក្រោយ គឺបន្តបញ្ជូប្រទេសវៀតណាមតែម្ដងកាលពីថ្ងៃទី៤ ឧសភា៕