Leicester អង្វរ Vardy កុំទាន់ចាកចេញទៅ Arsenal

ក្លឹបកញ្ជ្រោងខៀវ Leicester City បានស្នើសុំដល់តារាឆ្នើម Jamie Vardy ឲ្យបន្តនៅជាមួយក្រុមជើងឯកអង់គ្លេសទៀត ដោយពួកគេ គ្រោងនឹងដំឡើងថ្លៃឈ្នួលឲ្យបន្ថែម ដើម្បីកុំឲ្យខ្សែប្រយុទ្ធរូបនេះ ផ្ទេរទៅក្លឹបកាំភ្លើងធំ Arsenal។

Arsenal ជឿជាក់ថា ពួកគេនឹងអាចចុះកិច្ចសន្យាទិញយក Vardy បានផ្លូវការ នៅមុន Euro 2016 ក្នុងតម្លៃប្រហែល ២០លានផោន (ជិត២៩លានដុល្លារ) ហើយកីឡាករជម្រើសជាតិអង់គ្លេសរូបនេះ នឹងចុះកុងត្រា៣ ឬ៤ឆ្នាំនៅកីឡដ្ឋាន Emirates ដោយទទួលបានថ្លៃឈ្នួល ១២០០០០ផោន (ជាង១៧ម៉ឺនដុល្លារ) ក្នុង១សប្ដាហ៍ ដែលជាតម្លៃមួយ ច្រើនជាងនៅក្លឹប Leicester ២ដង។

យ៉ាងណាក្ដី អ្នកចាត់ការ Claudio Ranieri របស់ក្រុម Leicester មិនចង់បាត់បង់ខ្សែប្រយុទ្ធឆ្នើមរបស់លោកឡើយ ដោយលោកនឹងព្យាយាមគ្រប់បែបយ៉ាងជាមួយក្លឹប គ្រោងដំឡើងថ្លៃឈ្នួលឲ្យខ្សែប្រយុទ្ធជម្រើសជាតិអង់គ្លេសរូបនេះបន្ថែម ដើម្បីកុំឲ្យរូបគេផ្ទេរទៅក្រុមកាំភ្លើងធំ។ ប៉ុន្តែបើ Vardy ចាកចេញ អ្នកចាត់ការសញ្ជាតិអ៊ីតាលី នឹងទិញយកខ្សែប្រយុទ្ធ Troy Deeney ប្រធានក្រុម Watford ទៅជំនួសវិញ ក្នុងតម្លៃប្រហែល ១០លានផោន (ជាង១៤លានដុល្លារ)៕