Ronaldinho វីរបុរសក្រុមបាល់ទាត់ជម្រើសជាតិប្រេស៊ីល បានបង្ហាញខ្លួនក្នុងការប្រកួតសប្បុរសធម៌មួយ កាលពីយប់មិញ និងបានញាក់ស៊ីប្រឡោះជើងគេ២នាក់ ត្រឹមរយៈពេលតែ៤វិនាទីប៉ុណ្ណោះ ធ្វើឲ្យអ្នកទស្សនាជាច្រើនស្ងើចសរសើរថា អតីតតារាជើងញាក់ឆ្នើមរូបនេះ នៅតែពូកែ ទោះវ័យចាស់បន្តិចហើយក៏ដោយ។
កីឡាករវ័យ៣៦ឆ្នាំរូបនេះ បានលេងឲ្យក្រុម Rest of the World ក្នុងការប្រកួតសប្បុរសធម៌ Soccer Aid ទល់នឹងក្រុមអង់គ្លេស នៅកីឡដ្ឋាន Old Trafford របស់ក្រុម Manchester United កាលពីយប់មិញ។ អំឡុងពេលប្រកួតនោះ Ronaldinho បានញាក់ស៊ីប្រឡោះជើង Ben Shepherd និង Phil Neville យ៉ាងអស្ចារ្យ៕