រាជធានីភ្នំពេញ ៖ បុរសមិនស្គាល់អត្តសញ្ញាណម្នាក់ដែលមានឈ្មោះក្នុងគណនីហ្វេសប៊ុក រាជបុត្រ សូរ្យកាយ្យ បានបង្ហោះវីដេឃ្លីបប្រមាថ មាក់ងាយ តារាសម្តែងអ្នកនាងចន ច័ន្ទលក្ខិណា បន្ទាប់ពីនាងបញ្ចេញមតិចូលទៅបញ្ហានយោបាយមួយរយៈចុងក្រោយនេះ ។ បុរសនោះបានចោទប្រកាន់តារាសម្តែងអ្នកនាងចន ច័ន្ទលក្ខិណា ថា មាននិន្នាការលើគណបក្សប្រជាជនកម្ពុជា និងហ៊ានចេញមុខចេញមាត់ជួយបក្សកាន់អំណាចមួយនេះ ដើម្បីលាភសកា្ករៈ ។
តាមរយៈវីដេអូឃ្លីបបុរសមិនស្គាល់អត្តសញ្ញាណរូបនោះបានអះអាងថា ពីដើមឡើយខ្លួនគឺជាអ្នកដែលគាំទ្រការសម្តែងរបស់អ្នកនាង ចន ច័ន្ទលក្ខិណា ព្រោះយល់ថា តារារូបនេះចូលចិត្តនិយាយបញ្ហាពិតដែលបានកើតឡើងនៅក្នុងសង្គម ។ មកដល់ឥឡូវខ្លួនមិនគាំទ្រតារារូបនេះទៀតទេ បន្ទាប់ពីនាងមានស្វាមីថ្មីយ៉ាងចេញមុខចេញមាត់ និងបានចូលរួមជាមួយគណបក្សកាន់អំណាច ហើយក្លាយជាប្រធានសមាគមមួយ ។
បុរសនោះជេរប្រមាថតារាសម្តែងអ្នកនាងចន ច័ន្ទលក្ខិណា ដោយក្នុងនោះចោទថា មិនបានធ្វើកិច្ចការងារអ្វីឡើយក្នុងនាមជាប្រធានសមាគមជួយអ្នកសិល្បៈ ជាក់ស្តែងក្នុងពេលអតីតតារាសម្តែងជើងចាស់លោកហង្ស ផល្លីមធុរ៉ា ទទួលមរណភាព ។ អ្នកនាងចន ច័ន្ទលក្ខិណា ចេញមុខចេញមាត់ដូចជាកញ្ញាធី សុវណ្ណថា ទីពីរ ដែលល្បីខាងឲ្យគេជេរប្រមាថ ខណៈពេលដែលចន ច័ន្ទលក្ខិណាល្បីល្បាញក្នុងនាមជាអ្នកសិល្បៈទៅហើយនោះ ។
លើសពីនោះសមាគមសិល្បៈរបស់អ្នកនាង ចន ច័ន្ទលក្ខិណា ដែលចេញលិខិតថ្កោលទោសទៅលើអ្នកតំណាងរាស្ត្រអូស្ត្រាលីដើមកំណើតខ្មែរមួយរូបដែលបានប្រមាថថា «របបនៅក្នុងប្រទេសកម្ពុជាសព្វថ្ងៃជារបបតិរច្ឆាន» នោះ បុរសដដែលបានចាត់ទុកអ្នកនាងចន ច័ន្ទ ធ្វើបែបនោះមិនត្រឹមត្រូវទេ ព្រោះខ្លួនត្រឹមជាប្រជាពលរដ្ឋខ្មែរមួយរូបប៉ុណ្ណោះ ។ បុរសរូបនោះលើកឡើងថា អ្នកនាងចន ច័ន្ទលក្ខិណា មិនទាន់បានក្លាយជាជំទាវ ឬជាមនុស្សដែលមានមុខមាត់ធំដុំណាមួយនៅក្នុងសង្គមឡើយ និងបានចោទនាងថា កើតមកដើម្បីជួយខ្មែរ ឬមកបំផ្លាញខ្មែរ ។
បុរសមិនស្គាល់អត្តសញ្ញាណនោះបានរំឭកពីការចេញមុខរកយុត្តិធម៌ឲ្យនាងស្រីមុំ ដែលជាស្រីស្នេហ៍របស់លោកកឹម សុខា ពីអ្នកនាងចន ច័ន្ទលក្ខិណា ដោយវាយបកអ្នកនាងចន ច័ន្ទលក្ខិណា ថាមេ៉ចមិនរកយុត្តិធម៌សម្រាប់ខ្លួនឯងទៅនៅពេលដែលស្វាមីបានលែង និងទៅយកភរិយាថ្មី ឬមកពីនាងផិតប្តីដូចការចោទប្រកាន់មែន ។
តាមរយៈវីដេអូឃ្លីបបុរសនោះបានអំពាវនាវដល់អ្នកនាងចន ច័ន្ទលក្ខិណា ឱ្យជួយរកយុត្តិធម៌ចំពោះការស្លាប់របស់លោកកែម ឡី ផងដែរ ។
តាមរយៈវីដេអូឃ្លីបបុរសនោះបានអំពាវនាវដល់អ្នកនាងចន ច័ន្ទលក្ខិណា ឱ្យជួយរកយុត្តិធម៌ចំពោះការស្លាប់របស់លោកកែម ឡី ផងដែរ ។
ពាក់ព័ន្ធទៅនឹងការចោទប្រកាន់របស់បុរសនោះ អ្នកនាងចន ច័ន្ទលក្ខិណា មិនទាន់ចេញមុខតទល់អ្វីឡើយទេ គិតត្រឹមថ្ងៃទី១២ សីហា ២០១៦ ប៉ុន្តែនាងបានបញ្ចេញសារដ៏ខ្លីមួយ តាមហ្វេសប៊ុសដោយអះអាងថា «ឆ្កែព្រុសបានតែក្រៅរបង បើខ្លាំងមកព្រុសក្នុងរបងមកកុំកំសាកពេក » ។
ឆ្លើយតបទៅនឹងអ្នកគាំទ្រដែលជម្រុញឲ្យនាងប្តឹងបុរសនោះ អ្នកនាងចន ច័ន្ទលក្ខិណា អះអាងថា គេមានមូលដ្ឋាននៅក្រៅប្រទេស ប្រសិនបើនៅក្នុងប្រទេសនាងនឹងចាត់ការទៅតាមផ្លូវច្បាប់ ៕
