AP កាលពីពេល ថ្មីៗកន្លងមកផ្សាយថា សាខាស្រាវជ្រាវការជួញដូរសត្វព្រៃ(TRAFFIC) នៃចក្រភពអង់គ្លេស បានចេញសេចក្តីថ្លែងការណ៍កាលពីពេល ថ្មីៗកន្លងមកអំពាវនាវដល់រដ្ឋាភិបាលឥណ្ឌូណេស៊ី ឱ្យអនុវត្តឱ្យប្រាកដប្រជាលើការបង្ក្រាបការជួញដូរខុសច្បាប់បក្សីជាច្រើនប្រភេទដែលប្រឈមមុខនឹងការជិតផុតពូជ និងប្រទះឃើញមានច្រើនក្នុងទីផ្សារនៅទូទាំងប្រទេស ។
លទ្ធផលការស្រាវជ្រាវរបស់ TRAFFIC ឃើញថា មានបក្សីជិត២៣.០០០ក្បាល ដាក់លក់នៅក្នុងផ្សារចំនួន៥នៅទីក្រុង ធំៗចំនួន៣នាភាគខាងកើត និងភាគកណ្តាលនៃកោះជ្វា នាទីក្រុង Surabaya, Yogyakarta និង Malang ។ ចំពោះបក្សី២៨ក្បាល ក្នុងចំណោម២៤១ប្រភេទ ដែលប្រទះឃើញទទួលការការពារយ៉ាងជិតដិតតាមច្បាប់របស់ឥណ្ឌូណេស៊ី ក្នុងនោះសំដៅលើការហាមបរបាញ់ និងជួញដូរ។ ក្នុងចំនួននោះមានទាំងបក្សីរោមមាស ស្លាបពណ៌ស-ខ្មៅ គឺជាសត្វដែលប្រឈមមុខនឹងការជិតផុតពូជ និងប្រទះឃើញនៅកោះជ្វា និងនៅកោះបាលីប្រទេសឥណ្ឌូណេស៊ី ។
លោកសេរីន ឈៀង នាយកគម្រោងការរបស់ TRAFFIC ជាអ្នករៀបចំរបាយការណ៍ថ្មីទាក់ទិននឹងការជួញដូរសត្វព្រៃនិយាយថា ប្រសិនបើកម្រិតនៃការជួញដូរបក្សីក្នុងពេលបច្ចុប្បន្ននៅដំណើរការបន្ត តែប៉ុន្មានឆ្នាំទៅមុខបក្សីមួយចំនួននឹងបាត់បង់់ពីព្រៃ ។ បណ្តាបក្សីស្ថិតក្នុងបម្រាមត្រូវគេប្រទះឃើញដាក់លក់នៅតាមផ្សារ និងជាបក្សីមានទីជម្រកនៅឥណ្ឌូណេស៊ី និងប្រហែល១៥% ឃើញនៅកន្លែងផ្សេងនៅលើពិភពលោក ។
នៅក្នុងច្បាប់របស់ឥណ្ឌូណេស៊ីការជួញដូរសត្វព្រៃ គឺមានទោសជាប់គុកតិចជាង៥ឆ្នាំ និងពិន័យប្រាក់១០០លានរូពី ប្រាក់ឥណ្ឌូណេស៊ី ឬប្រហែល៧.៥០០ដុល្លារ ។ ឥណ្ឌូណេស៊ី គឺជាប្រទេសមួយនៅប្រជុំកោះធំបំផុតនៅលើពិភពលោកមានប្រហែល១៧.០០០កោះ និងជាទីជម្រករបស់បក្សីដែលជិតផុតពូជជាង១៣០ប្រភេទ ៕
